Share |
نوفمبر 2012
23
رسالة إلى جدى
المصدر: الأهرام اليومى

جيهان الغرباوى

يا حبيبى يا جدى. قابلت وجه رب كريم ودخلت عالم الخلود السرمدى النورانى، وسبتنى في الدنيا الفانية مع المرحلة الانتقالية والنفق المظلم.
احسبك تعيش مع الملائكة في السماء. وانا هنا بتبهدل مع ناس دهماء، لا اصل ولا فصل ولا شجرة عيلة ولا ليهم اى موقع من الاعراب تعالى يا جدى شوف اللى احنا فيه. (مش هاتقدر تغمض عنيك).
الانصاص قامت والقوالب نامت، واللى كانت امه عياشة عامل علينا باشا، شبعة من بعد جوعة وسبحان العاطى الوهاب بعد الشبشب والقبقاب، وخسيس قال للاصيل تعالى اشتغل عندنا خدام. ضحك الاصيل وقال: دانا اطلع فوق جبل عالى. وتاكلنى الحدادى والغربان. ولا يقولوش الاصيل اشتغل عند الخسيس خدام.
خسارتك يا جدى العظيم. مالحقتش اغانى شفيق جلال، ، ولا حضرت حرب العراق. لا مشيت في ثورة، ولا ولا دريت بالربيع العربى، ولا نزلت ميدان التحرير.
مسكين يا جدى. لا شفت مشروع النهضة، ولا شاركت في تأسيسية الدستور. ولا انتخبت ام ايمن، ولا سمعت خطب الدكتور مرسى ولا دخلت فيلم العيد.
اتخطفت بدرى. الله يرحمك ويجعل مثواك الجنة ونعيمها.
لو كانوا عملوا كلية الفنون الجميلة ايامك، كنت بقيت العميد بلا منازع
ولو كنت دخلت الهندسة، كنت سبت لى شركة مقاولات قد الدنيا، وفلوس متلتلة، وكنت زمانى دلوقت بنافس ممدوح حمزة، ومش بعيد كنت امول شباب 6 مارس!
يالله. مفيش احسن من السيرة الحلوة، وانت سيرتك زى المسك في العالم كله، منين ما اروح ويعرفوا انى حفيدتك بيحترمونى ويقدرونى، ويبقوا عايزين يشيلونى من على الارض شيل.
جدى العزيز. كم انا فخورة بك.
الناس كلها فكراك وانا لسة ع العهد.
ما زلت اسكن في شارع العيلة القديم، حيث عشت انت وبنيت اهم مشاريعك وخصصت المكان المناسب لمدافن الاسرة الكريمة.
مازلت يا جدو اسكن في شارع الهرم، على مقربة شديدة من هرمك الكبير، المسمى باسمك، عنوانا لاحدى عجائب الدنيا السبع
جدى خوفو الحبيب. تعالى شوف اللى جرى لنا من بعدك.
تعالى شوف الحوسة والخيبة القوية. تخيل يا جدو عيلتنا اتفركشت واموالنا اتسرقت واتهربت والظاهر اكل الفول سنين طويلة مع العيش المدعم والمياه الملوثة طمس اخر عرق للعبقرية في سلالتك المصرية
جدى الخالد المهيب، ايها الغائب الحاضر، اعلم انك اقوى من حثالة القوم الذين يذكرونك بالشر، أويهددون بيتك ومقبرتك بالهدم
لا تقلق يا حبيبى، الصراصير قد تتسلق الجدران مرة لكن التاريخ لم يذكر ابدا انها تستطيع هدم قصر الملك!
بالمناسبة يا جدو الملك. انا عارفة انك مهم وعندك علاقات وحبايبك كتير في العالم كله، ممكن تجيبلى شغلانة حلوة وتساعدنى اسافر برة؟!.